Núgildandi lög Röskvu eru svohljóðandi:

.

I. kafli. Nafn og markmið

1. gr.
Nafn samtakanna er Röskva, samtök félagshyggjufólks við Háskóla Íslands. Lögheimili þeirra og varnarþing er í Reykjavík.

2. gr.
Markmið samtakanna er að stuðla að öflugri hagsmunabaráttu stúdenta, jafnt innan sem utan háskólans, með jafnrétti til náms að leiðarljósi, óháð efnahag, búsetu, kynferði, kynhneigð og stöðu að öðru leyti. Jafnframt að stuðla að kvenfrelsi og jöfnum rétti kynjanna á öllum sviðum háskólasamfélagsins.

3. gr.
Allir stúdentar við Háskóla Íslands geta orðið félagar í Röskvu. Aðild félaga rennur út einu ári eftir útskrift þeirra frá Háskóla Íslands. Úrsögn úr samtökunum skal vera skrifleg og berast til stjórnar samtakanna.

II. kafli. Aðalfundur

4. gr.
Fráfarandi stjórn skal skipa þriggja manna nefnd sem sér um skipulagningu og framkvæmd aðalfundar. Skal hún skipuð eigi síðar en tveimur vikum fyrir áætlaðan aðalfund. Þeir sem sitja í aðalfundarnefnd eru ekki kjörgengir til stjórnar samtakanna það árið.

5. gr.
Aðalfund samtakanna skal halda árlega, innan tveggja mánaða frá kosningum til Stúdentaráðs. Til aðalfundar skal boða með minnst viku fyrirvara og skal hann auglýstur tryggilega í byggingum Háskóla Íslands og á heimasíðu samtakanna. Í fundarboði skal auglýst eftir framboðum til stjórnar samtakanna.

6. gr.
Atkvæðisrétt á aðalfundi hafa allir félagsmenn, sem skráðir eru í samtökin viku fyrir aðalfund.

7. gr.
Framboðum til stjórnar og embættis skoðunarmanna reikninga skal skila til aðalfundarnefndar eigi síðar en þremur sólarhringum fyrir upphaf aðalfundar. Kjörgengi til stjórnar hafa allir félagsmenn nema þeir sem eiga sæti í Stúdentaráði fyrir hönd samtakanna.

8. gr.
Dagskrá aðalfundar skal vera eftirfarandi:
a) Setning.
b) Kosning fundarstjóra og -ritara aðalfundar.
c) Afstaða tekin til kosningaréttar fundarmanna.
d) Skýrsla stjórnar fyrir liðið ár kynnt.
e) Endurskoðaðir reikningar samtakanna kynntir og bornir upp til samþykktar.
f) Lagabreytingar.
g) Kjör stjórnar í eftirfarandi röð: Formaður, varaformaður, ritari, gjaldkeri, ritstjóri, sex meðstjórnendur. Að auki skulu kjörnir allt að 11 varamenn stjórnarinnar.
h) Kjör tveggja skoðunarmanna reikninga auk varamanns.
i) Önnur mál.
j) Fundarslit.

9. gr.
Komi fleiri en tvö framboð í embætti og enginn frambjóðandi hlýtur hreinan meirihluta atkvæða skal kosið aftur á milli þeirra tveggja er flest atkvæði hljóta.

Kjör meðstjórnenda skal vera með þeim hætti að hver skal kjósa sex einstaklinga, hvorki fleiri né færri. Verði tveir eða fleiri frambjóðendur jafnir sem sjötti meðstjórnandi skal kosið sérstaklega á milli þeirra.

Kjör varamanna skal vera eins háttað og meðstjórnanda en stjórn samtakanna getur einnig skipað varamenn.

Óski fundarmaður eftir leynilegri kosningu í embætti sem ekki er sjálfkjörið í skal verða við þeirri ósk.

10. gr.
Lögum samtakanna verður aðeins breytt á aðalfundi og ræður aukinn meirihluti (2/3) atkvæða fundarmanna.

11. gr.
Formaður getur boðað til aukaaðalfundar, að fengnu samþykki stjórnar. Boðað skal til hans með sama hætti og um aðalfund væri að ræða, sbr. 5. gr.

III. kafli. Stjórn samtakanna og starfsemi þeirra

12. gr.
Á fyrsta fundi stjórnar eftir aðalfund skiptir hún með sér verkum að öðru leyti en því sem aðalfundur ákveður. Stjórnarmeðlimir skulu kynna sér lög samtakanna og starfa eftir þeim.

13. gr.
Formaður samtakanna stýrir starfi stjórnar og útdeilir verkefnum öðrum en eftirtöldum.Varaformaður annast félagatal. Ritari heldur gerðarbók stjórnar. Gjaldkeri annast fjármál samtakanna og skal halda bókhald þeirra. Ritstjóri hefur umsjón með málgagni samtakanna og heimasíðu þeirra.

14. gr.
Formaður samtakanna boðar til stjórnarfunda og og stýrir þeim. Þrír stjórnarmenn geta krafist stjórnarfundar og er þá formanni skylt að kalla stjórn saman til fundar innan þriggja sólarhringa. Til þess að stjórnarfundur teljist löglegur þurfa minnst sex stjórnarmenn að vera viðstaddir. Á stjórnarfundum ræður einfaldur meirihluti atkvæða stjórnar. Varamenn hafa ekki atkvæðisrétt á stjórnarfundi nema þegar þeir leysa af stjórnarmann í forföllum hans.

Stjórnarfundir skulu vera opnir Stúdentaráðsliðum samtakanna og fulltrúum þeirra á Háskólaþingi. Hafa þeir málfrelsis- og tillögurétt, en atkvæðisrétt hafa einungis meðlimir stjórnar. Krefjist meirihluti stjórnar þess skal fundur vera lokaður. Oddviti Röskvu í Stúdentaráði má þó alltaf sitja stjórnarfundi.

15. gr.
Stjórn samtakanna skal skipa málefnahópa sem fara með sömu málaflokka og fastanefndir Stúdentaráðs. Skulu þeir vera ráðgefandi fyrir stjórn samtakanna og Stúdentaráðsliða. Fulltrúi/ar Röskvu í viðkomandi nefndum Stúdentaráðs skal/skulu sitja í viðkomandi málefnahópunum.

16. gr.
Gagnkvæm upplýsingaskylda skal ríkja á milli Stúdentaráðsliða, stjórnar Röskvu og annarra félagsmanna. Sameiginlegir stórfundir skulu haldnir reglulega, mánaðarlega hið minnsta. Stórfundur mótar stefnu Röskvu í öllum helstu málum og fyrir hann skal leggja ágreiningsmál sem lög þessi mæla ekki á annan veg um.

Formaður samtakanna boðar stórfundi með minnst sólarhrings fyrirvara. Oddviti í Stúdentaráði getur þó krafist stórfundar með viku fyrirvara. Kosningarétt hafa þeir sem skráðir voru í samtökin sólarhring fyrir fundinn.

17. gr.
Segi embættismaður samtakanna af sér skal boðað til stórfundar innan viku frá afsögn. Þar skal kosið á ný í viðkomandi embætti og fer sá aðili með umboð fram að næsta aðalfundi.

IV. kafli. Kosningar til Stúdentaráðs

18. gr.
Stjórn samtakanna skipar fimm manna kosningastjórn eigi síðar en 1. nóvember ár hvert. Í kosningastjórn skulu sitja tveir kosningastjórar, kosnir á stórfundi, fjármálastjóri kosinn af stjórn Röskvu, einn stjórnarmeðlimur útnefndur af stjórn og einn Stúdentaráðsliði útnefndur af Stúdentaráðsliðum Röskvu.

19. gr.
Skipa skal uppstillingarnefnd eigi síðar en 1. nóvember ár hvert. Í henni skulu eiga sæti tveir aðilar úr kosningastjórn, tveir aðilar tilnefndir af Stúdentaráðsliðum og þrír aðilar tilnefndir af stjórn. Stórfundur samtakanna getur komið sér saman um breytt fyrirkomulag á skipan uppstillingarnefndar. Þeir sem sitja í nefndinni skulu ekki taka sæti á framboðslista samtakanna til Stúdentaráðs, að undanskildum heiðurssætum. Hlutverk uppstillingarnefndar er að stilla upp á framboðslista samtakanna. Óski félagsmaður eftir að tilnefna frambjóðanda skal honum gert kleift að koma ósk sinni á framfæri við uppstillingarnefnd.

20. gr.
Framboðslistar Röskvu skulu bornir undir stórfund til samþykkis, eigi síðar en þremur vikum fyrir kjördag. Séu stórfundargestir á framboðslista skulu þeir hafa setu- og kosningarétt á fundinum en verða að víkja þurfi að ræða þá sérstaklega.

21. gr.
Stjórn samtakanna skal skipa í málefnanefnd fyrir 1. nóvember ár hvert. Málefnanefnd er ábyrg fyrir málefnavinnu fyrir kosningar og skal standa að útgáfu málefnaskrár.

22. gr.
Formanns- eða oddvitaefni Röskvu í Stúdentaráði skal kosið á sérstökum fundi svo fljótt sem unnt er eftir úrslit kosninga. Boðað skal til fundarins með sama hætti og stórfundar sbr. 2. mgr. 16. gr. Atkvæðisrétt hafa:
a.    6 efstu frambjóðendur á nýkjörnum listunum tveimur til Stúdentaráðs.
b.    2 efstu frambjóðendur á nýjasta lista Röskvu til Háskólaráðs.
c.    Nýkjörnir fulltrúar Röskvu á Háskólaþingi.
d.    Stjórnarmeðlimir Röskvu og allt að 11 varamenn.

Kosningarnar skulu vera leynilegar. Berist einungis eitt framboð er sjálfkjörið í embættið en komi fleiri en tvö framboð og enginn frambjóðandi hlýtur hreinan meirihluta atkvæða skal kosið aftur á milli þeirra tveggja er flest atkvæði hljóta.

Ákvæði 1. og 2. mgr. gilda einnig um val milli annarra fulltrúaefna Röskvu í Stúdentaráði.

23. gr.
Skipan í fastanefndir Stúdentaráðs fyrir hönd Röskvu skal vera ákveðin af Stúdentaráðsliðum samtakanna. Samráð skal þó haft við stjórn samtakanna sem og aðra félagsmenn eins og unnt er.

V. kafli. Ýmis ákvæði

24. gr.
Heimilt skal stjórn að leiðrétta augljósar stafsetningarvillur eða misritanir í lögum þessum utan aðalfundar. Breytingarnar skulu þó bornar undir næsta reglulega aðalfund til staðfestingar.

25. gr.
Ákvörðun um slit samtakanna verður tekin á aðalfundi með auknum meirihluta (2/3) atkvæða. Fundurinn skal einnig taka ákvörðun um hvað skal gera við eignir og skuldir samtakanna.

26. gr.
Lög þessi öðlast þegar gildi.

VII. kafli. Ákvæði til bráðabirgða

27. gr.
Á aðalfundi Röskvu 2009 eftir samþykkt þessara laga skulu þeir stúdentar, sem skráðir eru í nám við Háskóla Íslands og uppfylla eitt eða fleiri af eftirtöldum skilyrðum, hafa atkvæðisrétt til kosninga stjórnar Röskvu:
1.    Hafa setið í stjórn Röskvu.
2.    Hafa verið á framboðslista fyrir hönd Röskvu, hvort sem er til Stúdentaráðs, Háskólaþings, Háskólaráðs eða Háskólafundar.

Þeim, sem ekki uppfylla þessi skilyrði, skal þó leyft að kjósa ef þeir hafa starfað fyrir samtökin, stutt það og hafa áhuga á málefnum Röskvu. Aðalfundarnefnd sker úr um atkvæðisrétt þessara aðila.